Ndoshta të qëndruarit në shtëpi për një kohë të gjatë nuk është zgjedhje e mirë për ju dhe është jashtë rutinës tuaj. Ndoshta ju e doni shumë punën tuaj, ose ndoshta jeni nga ata tipa që “ju ha shtëpia” dhe e keni të pamundur të rrini 24 orë brenda saj.

Sigurisht, pa përjashtuar faktin që shumica prej nesh e kanë të nevojshme të dalin jashtë për hir të punës, ju sugjerojmë që gjatë qëndrimit në shtëpi të përpiqeni të gjeni zgjidhje alternative, si për shembull, kërkimi i punëve që mund t’i zhvilloni online.

E megjithatë, disa të tjerë mendojnë se universi ka dëgjuar dëshirën e tyre për disa ditë të mira pushimi, për t’ju shmangur atij ambjentit toksik në punë që s’ju fal kurrë kënaqësi e për të kaluar kohë me të dashurit e tyre (për ju sugjerojmë të kërkoni një punë të re këto kohë).

Për ju që të qëndruarit në shtëpi nuk është më e mira e mundshme që mund t’ju ndodhte, mos harroni që nuk ka të bëjë me zgjedhjen, por me zgjidhjen. Dhe në një situatë të tillë, qëndrimi në shtëpi është zgjidhja.

Gjithmonë ka gjëra argëtuese që mund të bëjmë në shtëpi. Thjesht duhet të vendosim pak në punë imagjinatën. Lista e gjërave të këndshme që mund të bëjmë është e pashtershme. Ne do të ndajmë me ju disa gjëra argëtuese që mund të bëni duke qëndruar në shtëpi këto ditë.
Ju mund të keni edhe sugjerime të tjera që mund t’i ndani me ne në rrjetet sociale.

Shikoni serialet tuaja të preferuara ose zgjidhni një të ri. Ka shumë seriale që mund të shikoni për disa ditë me radhë. Zgjidhni një zhanër që do të shijonte familja juaj. Planifikoni disa mbrëmje me radhë për serialin që do të shihni. Sigurohuni që të keni shumë kokoshka dhe patatina në dorë! (këto mund t’i blejë një anëtar i familjes tuaj duke u siguruar që të marrë masat e nevojshme para se të shkojë në market). Nëse doni të jeni me të vërtetë krijues, mendoni se çfarë mund të shkojë me temën e filmit dhe vendoseni në zbatim. Ju madje mund të bëni një ëmbëlsirë që përputhet me temën e filmit.
Planifikoni një mbrëmje karaoke. Kjo është një mënyrë e shkëlqyer për të kaluar kohën me familjen. Nga përvoja, kjo është një mbrëmje me shumë të qeshura dhe gëzim! Të gjithë pëlqejnë të këndojnë … edhe ata që mund të mos kenë zë për të kënduar, dëshirojnë të debutojnë në karaoke.
Lexoni për vete dhe për fëmijët tuaj. Arti i të lexuarit me zë të lartë ka humbur popullaritetin e tij. Zgjidhni një libër që do të ishte interesant për familjen tuaj dhe lexoni me zë të lartë historinë që ta dëgjojë e gjithë familja.
Mësoni të bëni Joga dhe bëni ushtrime fizike. Joga është shumë e dobishme për çdo grupmoshë. Mësoni joga ose zgjidhi të bëni ushtrime fizike. Ka shumë mënyra për t’i bërë këto. Ju mund të gjeni video online ku mund të merrni mësime të mira joge apo ushtrimesh fizike. Kjo është një mënyrë shumë e mirë për të shijuar një bashkëveprim të shëndetshëm si familje.
Kujdesuni për kopshtin dhe për shtëpinë tuaj. Të kujdeseni për bimët në shtëpinë tuaj është antistres. Merrni vazot e luleve, pastrojini lulet nga gjethet e thara, rregulloni plehun rreth tyre. Nëse keni oborr me pemë kujdesuni dhe për tokën rreth tyre. Ose ridekoroni shtëpinë tuaj nga e para. Do ndiheni shumë krenar për veten kur të shikoni rezultatet në fund.
Gatuani me familjarët tuaj. Të ndihmoni me gatimin në familje është gjëja më e mirë që mund të bëni. Do të rrisni komunkimin mes jush dhe situata mund të kthehet në argëtim të vërtetë kur luani me mbetjet e ushqimit (pa e tepruar).

Sigurisht që të qëndruarit në shtëpi për një kohë të gjatë mund të sjellë edhe konflikte të vogla. Mundohuni ta shfrytëzoni këtë kohë për të përmirësuar komunikimin mes jush dhe të përpiqeni të kuptoni më tepër njëri-tjetrin.

Edhe pse qëndrimi në shtëpi është një situatë jo shumë e këndshme për disa prej jush, sakrifikoni pak, qoftë edhe për familjarët tuaj. Dilni në ballkone, në oborr apo në dritare për të shijuar të gjithë gëzimin që të sjell pranvera. Nëse vendosni të dilni jashtë, dilni vetëm, zbatoni masat që mjekët këshillojnë dhe mos qëndroni gjatë. Jeta është gjëja më e shtrenjtë që ka njeriu dhe duhet të dimë të kujdesemi për të.

#qendronitesigurt #kujdesuperveten

Burimi: gjejbiznese.com