Sfida të shumta vijnë me fillimin e një biznesi të ri. Një mënyrë për t’i mbajtur gjërat të pastra dhe të thjeshta që nga fillimi është që të ndahen më herët financat e biznesit dhe financat personale.

Është e lehtë t’i përzieni të dyja, duke vendosur shpenzimet e biznesit në kartën personale të kreditit, dhe anasjelltas. Me kalimin e kohës, kjo mund të jetë e dëmshme jo vetëm për biznesin tuaj, por edhe për jetën tuaj personale. Më keq akoma, kjo mund të sjellë edhe probleme ligjore.

Pse duhet të ndani financat e biznesit tuaj me ato personale?

Së pari dhe më kryesorja, ndarja e financave të biznesit tuaj nga financat personale do t’i bëjë gjërat shumë më të lehta kur të vijë sezoni i taksave. Mbajtja e llogarive të veçanta bankare dhe kartave të kreditit për biznesin tuaj, do ta bëjë shumë më të lehtë ndjekjen dhe regjistrimin e shpenzimeve. Kjo ju ndihmon që të përfitoni zbritje tatimore për shpenzimet e biznesit tuaj dhe i bën gjërat shumë më të drejtpërdrejta në qoftë se Shërbimi Tatimor ju kontrollon.

Së dyti, të keni llogari bankare të ndara dhe karta krediti për biznesin tuaj, ndihmon që të dukeni më profesional kur krijoni marrëdhenie me tregtarët dhe shitësit.

Së fundi, ndarja e financave të biznesit nga financat tuaja personale ju lejon të filloni krijimin e një kredie posaçërisht për biznesin tuaj. Kredia e biznesit tuaj është e ndarë nga rezultatet tuaja personale të kreditit dhe raportet tuaja. Është një ide e mirë që të përqendroheni në krijimin dhe ndërtimin e kredisë për biznesin sa më shpejt që të jetë e mundur, pasi kjo do t’ju lejojë të aplikoni për hua më të mëdha të biznesit dhe karta të kreditit të nivelit të lartë kur biznesi juaj të rritet.

1. Regjistroni biznesin tuaj si entitet i veçantë ligjor

Hapi i parë që duhet të bëni është regjistrimi i biznesit tuaj. Ka lloje të shumta të strukturave të biznesit për të zgjedhur. Kërkoni se cila strukturë biznesi i përshtatet më shumë qëllimeve tuaja dhe mendoni seriozisht rreth një koorporate. Kjo do t’ju lejojë të krijoni një skedar të veçantë kreditimi nën emrin e biznesit tuaj dhe të kufizoni përgjegjësinë e pronarit të biznesit.
Ekzistojnë disa struktura të ndryshme biznesi që përfshijnë biznesin tuaj (për shembull person fizik, juridik ose shoqëri me përgjegjësi të kufizuar), prandaj sigurohuni që të hulumtoni se cila strukturë i përshtatet më mirë nevojave të biznesit tuaj.

2. Aplikoni për një Numër Unik Identifikimi (NIPT)

Pas regjistrimit të biznesit tuaj, aplikoni për një numër identifikimi (NIPT) nëpërmjet faqes zyrtare të Qëndrës Kombëtare të Biznesit. Një NIPT, vepron disi si një numër i Sigurimeve Shoqërore, por për biznesin tuaj dhe jo për ju personalisht.
Një NIPT ju jep mundësinë të hapni llogaritë bankare të biznesit dhe të aplikoni për kredi dhe karta krediti nën emrin e biznesit tuaj. Një NIPT gjithashtu mund të përdoret në vend të numrit të Sigurimeve Shoqërore mbi dokumentat e biznesit, gjë që pakëson rastet e mashtrimit të numrit të Sigurimeve Shoqërore.

3. Hapni llogari bankare për biznesin

Duke përdorur NIPT – in tuaj, hapni llogaritë dhe kursimet nën emrin e biznesit tuaj. Ideja qëndron te përdorimi i këtyre llogarive ekskluzivisht për transaksionet e biznesit dhe kursimet.
Kjo do t’ju ndihmojë të kontrolloni më mirë shpenzimet e biznesit tuaj dhe kapitalin, që ato menaxhohen veçmas nga llogaritë tuaja personale. Kjo e bën mbajtjen e të dhënave financiare – për të mos përmendur periudhën e taksave – shumë më e lehtë.

4. Hapni një kartë krediti biznesi

Me NIPT dhe emrin e biznesit, mund të hapni një kartë krediti biznesi në emër të kompanisë suaj.
Një kartë krediti biznesi që përdorni vetëm për blerje biznesi ju ndihmon të ndani më tej financat tuaja. Nuk është zgjidhje e zgjuar të vendosni shpenzimet e biznesit në një kartë personale, jo vetëm për shkak të përzierjes së shpenzimeve tuaja personale dhe të biznesit, por për shkak se kartat e kreditit personal vijnë në përgjithësi me kufizime më të ulëta të kredisë.
Një numër i madh i shpenzimeve të biznesit të vendosur në një kartë personale mund të rrisë maksimalisht limitin tuaj të kredisë, duke ndikuar negativisht në rezultatet personale të kredisë.
Kartat e kreditit të biznesit gjithashtu vijnë me avantazhe të tjera, të tilla si shpërblime dhe përfitime të lidhura me biznesin, si kthimi i parave për blerjet tuaja më të shpeshta të biznesit, garancitë e gjata dhe sigurimet.

5. Vendosini vetes një pagë fikse

Vendosja e një rroge mujore prë veten është jetësore për shëndetin e biznesit tuaj, pasi ju ndalon të zhyteni në llogarinë tuaj të biznesit sikur të ishte banka juaj personale. Është zgjidhje të vendosni një depozitë të drejtpërdrejtë çdo muaj nga llogaria juaj e biznesit në llogarinë tuaj personale. Veproni sikur një kompani ju paguan një rrogë.

Ngritja, drejtimi dhe menaxhimi i biznesit tuaj është një sfidë monumentale dhe një përvojë mësimi. Ndiqni këto pesë hapa për t’ju ndihmuar të ndërtoni një kufi të fortë midis parave personale dhe financave të biznesit tuaj.

Burimi: articles.bplans.com