Hapja e një biznesi të ri shpesh është një proces që e mësoni me kalimin e kohës. Por, sa më herët të merrni vendime të zgjuara , aq më shumë shanse për sukses ka ndërmarrja juaj. Nëse keni një ide sipërmarrëse, ju japim këto dhjetë këshilla.

1. Shmangni justifikimet

Shumë njerëz ëndërrojnë të bëhen sipërmarrës, por kurrë nuk marrin përsipër të bëjnë diçka për këtë. Ata janë të ngarkuar me justifikime dhe frikë nga dështimi. Nga mungesa e parave e deri tek përgjegjësitë, gjenden një milion arsye për mos fillimin e një biznesi të ri.
Le ta pranojmë, të qënurit shef i vetes tënde është e frikshme.Gjithashtu, të shqetësoheni për rreziqet e mbajtjes së biznesit është krejt normale.
Por, justifikimet vetëm ngadalësojnë arritjen e qëllimeve tuaja. Nëse vërtet doni të filloni një biznes, duhet të shmangni arsyet që mendoni se nuk mund të filloni një biznes dhe të shpëtoni prej tyre.

2. Absorboni gjithçka

Dëgjoni ato që ju thonë të tjerët – miqtë, familja, ekspertët, madje edhe vetja juaj. Kur bëhet fjalë për gjëra që kanë të bëjnë me qëllimet tuaja sipërmarrëse, jini një sfungjer thithës. Ndërsa mësoni, filloni të përpunoni idenë në kokën tuaj. Shkruajini gjërat. Mbani shënime nga të gjitha burimet që ju hasni për të hartuar një plan të detajuar.
Kur u tregoni njerëzve për nismën tuaj, lexoni gjuhën e tyre të trupit . A ju pëlqen atyre vërtet ideja juaj apo, thjesht për t’u treguar të sjellshëm ju përgëzojnë, por në të vërtetë mendojnë se po shkoni në drejtim të gabuar. Inkurajoni dëgjuesit tuaj të jenë të sinqertë me ju. Opinioni kolektiv që merrni nga miqtë mund të jetë një pasqyrim i mënyrës se si do të reagojnë konsumatorët.
Mos e injoroni fuqinë e këshillave nga ekspertë dhe pronarë biznesesh. Këta njerëz e dinë me siguri se çfarë funksionon dhe çfarë jo. Sipërmarrësit e zgjuar mësojnë nga gabimet që kanë bërë drejtues të tjerë të biznesit.

3. Ofroni një zgjidhje

Në vend që të filloni me idenë se çfarë duhet të shisni, mendoni se çfarë do të zgjidhë biznesi juaj. Është shumë më e lehtë të fitoni klientë nëse biznesi juaj ofron zgjidhje të një problemi. Startup-i juaj duhet të plotësojë një boshllëk në një treg ose vend të caktuar.
Fokusohuni te qëllimi se pse po hapni biznesin tuaj. Të kuptoni motivet tuaja do t’ju ndihmojë të krijoni një markë dhe të tregtoni kompaninë tuaj. Kuptoni se me çfarë problemesh përballen klientët tuaj të synuar dhe si mund t’i zgjidhni ato.

4. Jini të thjeshtë

Nëse jeni si shumica e sipërmarrësve, ju keni një ide biznesi dhe jeni gati të filloni ta zbatoni atë. Tregoni kujdes që të mos e mbingarkoni konceptin për idenë tuaj të biznesit. Mund të përfundoni duke krijuar një produkt përfundimtar të shtrenjtë të cilin askush nuk dëshiron ta blejë.
Si pronar i një biznesi të ri, përpiquni të filloni pak nga pak dhe të ngushtoni fokusin tuaj. Krijoni një të mirë ose shërbim të thjeshtë dhe cilësor. Një ide e suksesshme biznesi duhet të përmbushë premtimet për klientët dhe të tejkalojë pritshmëritë e tyre.
Mënjanoni karakteristikat e panevojshme që zhysin ofertat tuaja dhe ju kushtojnë para. Do të jetë më e lehtë të shtoni elementë të rinj ndërsa biznesi juaj rritet.

5. Llogarisni shpenzimet

Pasi të zhvilloni idenë tuaj të biznesit, llogarisni se sa do ju kushtojë. Do ju duhet të faktoni çdo shpenzim të nevojshëm të biznesit për të filluar dhe operuar. Disa shpenzime për t’u mbajtur në mend përfshijnë vendndodhjen tuaj, qiranë, furnizimet, marketingun dhe të tjera.
Llogarisni vlerën e shpenzimeve që mendoni se do keni dhe katërfishojeni atë. Seriozisht, katërfishojeni atë. Do të haseni me shpenzime të papritura gjatë drejtimit të biznesit tuaj. Është më mirë të jeni të përgatitur për këto shpenzime sesa te shkurtoni fondet për një shpenzim të nevojshëm që ju del papritur.
Ndërkohë që mendoni për koston e fillimit të një biznesi të ri, mos harroni buxhetin tuaj personal. Shikoni se për sa para keni nevojë për të jetuar, përfshirë qiranë, ushqimin, gazin, kujdesin shëndetësor, etj. dhe mbajini të ndara nga shpenzimet e biznesit.
Pasi të keni kuptuar të gjitha shpenzimet tuaja, filloni të krijoni një buxhet biznesi. Në fillim, ju mund të duhet të merrni një kapital të jashtëm, për shembull, një kredi për biznesin e vogël. Kaloni nëpër mendje të gjitha opsionet që keni përpara se të futni paratë tuaja në lojë.

6. Imagjinojeni veten me zero para

E kam fjalën zero. Për bizneset e reja, ekziston një probabilitet i lartë që kjo të ndodhë.
Zbatimi i një ideje të pasuksesshme biznesi është një realitet për shumë sipërmarrës. Më shumë se gjysma e bizneseve të reja dështojnë brenda pesë viteve të para të hapjes. Si do ta përballonit këtë situatë pa pasur para?
Është një ide e mirë të hartoni një plan në rast se ndodh “më e keqja”. Do mund të keni nevojë të nisni një punë të re të përkohshme ose të jetoni përkohësisht me prindërit tuaj. Imgjinoni se si do t’ia dilnit nëse plani i biznesit tuaj do të shkonte në anë të kundërt.
Shikoni burimet tuaja aktuale të të ardhurave. Çfarë fitoni nga puna juaj e tanishme? Sa kohë do të zgjasnin kursimet tuaja nëse do hiqnit dorë? Cilat gjëra të papritura mund të prishnin planin tuaj? Përgatituni për të gjitha situatat që mund të ndodhin nëse ideja juaj e biznesit nuk do të funksiononte.

7. Fitoni ndërsa ndërtoni

Nëse doni të filloni një biznes të vogël, mos e braktisni punën tuaj aktuale. Nisja e një startup-i të suksesshëm është një proces që kërkon kohë. Ndërtoni biznesin tuaj dhe kaloni gradualisht nga punonjësi në sipërmarrës.
Si pronar i një biznesi të ri, do ju duhet pak kohë të fitoni të ardhura të qëndrueshme. Punoni diku tjetër dhe për biznesin tuaj punoni jashtë orarit zyrtar të punës, në mënyrë që të keni të ardhura gjatë periudhave të vështira. Pasi të keni një fluks të shëndetshëm të parave nga kompania juaj, ju mund të trajtoni pronësinë e biznesit gjatë gjithë kohës.

8. Flisni për biznesin tuaj

Një sfidë me të cilën përballen shumë pronarë të bizneseve është se ata nuk dinë të shesin. Mund t’ju trembë ideja për të ndarë biznesin tuaj me botën, veçanërisht kur jeni i ri.
Nëse shqetësoheni se çfarë do të mendojnë njerëzit për biznesin tuaj, duhet ta merrni pararsysh paraprakisht. Nëse nuk mund t’i bindni konsumatorët të blejnë nga ju dhe të mbështesin kompaninë tuaj, është e vështirë të fitoni para. Nëse vërtet doni suksesin në biznes, nuk mund t’ia dilni nëse trembeni.
Jini të gatshëm të flisni me siguri për biznesin tuaj, edhe nëse kjo ju bën të mos ndiheni rehat. Si një pronar i ri biznesi, do t’ju duhet të tregtoni dhe të lidheni vazhdimisht me njerëzit. Nga rrjetëzimi me klientët tek negociimi i kushteve të pagesës së furnizuesit, duhet të jeni të gatshëm të komunikoni.

9. Njihuni me kërkesat ligjore për fillimin e një biznesi të vogël

Fillimi i një biznesi është emocionues, por jo ligjet. Duhet të kuptoni rregullat që vijnë me hapjen e një biznesi. Nëse nuk respektoni rregulloret e qeverisë, mund të përballeni me dënime të mëdha.
Nga formimi i një strukture ligjore deri në krijimin e një sistemi kontabël, ju duhet të ndiqni ligjet. Ju duhet të regjistroni biznesin tuaj. Gjithashtu duhet të kujdeseni për detyrimet tatimore specifike të biznesit. Dhe ndërsa punësoni punonjës, duhet të ndiqni ligjet e punëdhënësve.
Rregullat varen nga shteti, struktura e biznesit dhe industria. Konsideroni të flisni me një kontabilist të biznesit të vogël ndërsa krijoni kompaninë tuaj.

10. Balanconi pasionin me njohuritë

Një nga përbërësit më të rëndësishëm në një ide të suksesshme të biznesit është pasioni. Pasioni do t’ju shtyjë vazhdimisht që të përmirësoni procesin tuaj në mënyrë që biznesi juaj të rritet.
Por, mos lejoni që pasioni të marrë përsipër të gjitha vendimet tuaja. Pasioni do ju ndihmojë të ecni përpara, por njohuria do t’ju tregojë në drejtimin e duhur.
Kryeni studime të tregut në industrinë tuaj dhe bisedoni me klientët e synuar për të zbuluar potencialin e biznesit tuaj. Pyesni ekspertë në lidhje me fillimin e një startup-i. Afrojuni profesionistëve që mund t’ju ndihmojnë në fusha të caktuara të biznesit, siç janë këshilltarët financiarë dhe avokatët.
Mendojeni biznesin tuaj sikur po i jepni një makine. Lëreni pasionin tuaj të godasë pedalin e gazit dhe mendja juaj të kontrollojë timonin. Në këtë mënyrë, ju mund të jeni të sigurt për drejtimin dhe të kujdeseni për shpejtësinë që ju duhet për të arritur te destinacioni i caktuar.

Burimi: Forbes